E-postlista r-hjelp-no

E-postlista r-hjelp-no er eit lågterskeltilbod for norskspråklege brukarar av statistikkpakken R. Her kan du stilla spørsmål om bruk av R, og hjelpa andre med svar. Alle typar R-relaterte spørsmål er velkomne, både enkle og meir avanserte.

Lista er meint å dekka mykje det same som den internasjonale r-help-lista, men på norsk, og med lågare terskel for deltaking. For å melda deg på, sjå innmeldings- og arkivsida.

For deg som spør

• Oppgje alltid eksempeldatasett og/eller fungerande eksempelkode for det du lurer på. Du gjer det då svært mykje enklare og raskare for andre å hjelpa deg (les: større sannsyn for å få hjelp). Eksempel:

  Eg arbeider med sjukefråværsdata. For kvar dag har eg registrert om ein person var sjuk (1) eller frisk (0). Eg ønskjer å finna lengdene på sjukeperiodane. Eksempel:

  > fråvær = c(0, 1, 1, 0, 1, 0, 0, 0, 1, 1, 1)

  Eg ønskjer ein funksjon som fungerer slik:

  > periodelengder(fråvær)
  2 1 3

  Finst det ein kjapp og enkel måte å gjera dette på i R?

• Ikkje send sensitive data til lista. Alle meldingar vert arkiverte og fritt tilgjengelege på Internett. Lag heller datasett som har same form som dataa du arbeider med. Ofte kan du bruka ferdige datasett i R; skriv data() for ei oversikt over desse. Eller du kan generera datasett sjølv, og senda programkoden for dette til lista. Eksempel:

  d = data.frame(
    verdi = rnorm(10),
    gruppe = sample(LETTERS[1:3], 10, replace=TRUE)
  )

  Om du har skreddarsydd eit lite datasett sjølv, får du ut kode for å gjenskapa det med:

  dput(mittdatasett)

  Sjå elles desse tre engelskspråklege tipsa for detaljinstruksar om korleis du kan, og korfor du bør, oppgje reproduserbare datasett og reproduserbar programkode.

• Lista er meint å vera eit lågterskeltilbod, men gjer heimeleksa di! Still for eksempel ikkje spørsmål der du lett kunne funne svaret sjølv i hjelpesystemet til R eller med eit kjapt søk på nettet, eller elementære spørsmål som du finn svar på i eikvar R-innføring (eksempelvis «korleis reknar eg ut eit gjennomsnitt i R?»).

For deg som svarar

• Send alltid svaret til lista, slik at det kan vera til hjelp for alle (òg framtidige lesarar av arkivet). Send det eventuelt i tillegg direkte til spørsmålsstillaren.

For alle

• Ver høfleg, hjelpsam og prøv å tolka alt i beste meining.
• Følg vanleg nettikette.
• Bruk fullt namn.

Teknisk

• Oppgje alltid ei relevant emnelinje i e-posten.
• Me godtar e-postar både i HTML- og reintekstformat, sidan mange s(l)it med dårlege e-postprogram dei har liten kontroll over sjølv.
• Me godtar små bildefiler som vedlegg. Maks storleik på e-post + vedlegg er 50 KiB. Men ikkje send datasett som vedlegg.

Er du usikker på om noko er OK å senda til lista, ta først kontakt med listeansvarleg, Karl Ove Hufthammer.